Halaka! Pastilan!

Duna na diay grupo sa mga kababayen-ang bloggers nga nitukod og “BisDak online.”

Pasayloa. Tan-awon ko unsaon nako ni kay naka una man sila sa ngalan sa blog.

Akong ginisisyunan nga dugangan ko nalang og “Jud” ang akong title sa blog aron malahi isip pagtahud sa nauna og gamit sa maong title.

Daghang salamat.

Duty-free sa Davao airport, pagabuksan

Dunay migawas nga taho nga ugma’ng adlawa pagabuksan na ang Duty Free shop didto sa Davao International Airport. Dili lang ko sigurado kung kini pagbukas “usab” kay niadtong panahon sa daan nga airport nakadungog ko nga duna na to siya’s duty-free bag-o nahitabo ang pagpamomba niadtong 2003.

Kini nga duty free shop, ug uban pang mga tindahan diha sa terminal sa maong airport gikataho nga maoy pinakauna sa Mindanao.

Tan-awon ta kini isip usa ka sinyales sa paguswag sa atong turismo diri sa rehiyon ug sa dakbayan.

Hinaut nga mas madinaugon ang maayong balita labaw sa kasamok.

Kasohi nalang ko ninyo – Bedol

Kangilngig gyud ni Bedol noh? Matud pa niya sa iyang pakig-hinabi sa usa ka reporter didto sa Dakbayan sa Cotabato, “Mahigugmaon kung tawo,” sa dihang iyang gipamakak nga gigamit daw niya ang iyang dala-dala nga pistola sama sa Magnum .35, ug uban pa sa pagpusil bisan sa iyang depensa. Wala gyud daw sukad. Na hala.

Ang kontrobersiyal nga si Lintang Bedol mao ang superbaysor sa Comelec didto sa probinsiya sa Maguindanao, kung hain dunay kasamok ug pagduda nga bibo kuno ang nilimbunga didto sa niaging pinili-ay.

Araguy tiyoy!

Ni sakay ko og tri-sikad ganiha aron makalikay sa grabeng kainit sa hapon ug aron madampihan pud og gamay nga hangin akong agtang.
“Kusog gyud ning ulan unyang gabi-i ba,” matud pa ni Pareng Arjan, ang piloto sa maong sakyanan. Unya gipangutana dayon ko niya: ngano kaha na no?

Ningirit ra ko kay marag nalimtan na nako unsa gani tong pagpasabot sa akong magtutudlo sa kolehiyo sa among klase sa Natural Sciences. Ambot wa na ko kadumdum, naka 1.25 pa naman unta ko og grado ato.

Sa dihang hapit na mi niabot sa nauganan, akong gipangutana si Arjan og lahi nga pangutana (aron ko maka balos?) Hehe

Adlaw ni San Juan sa Dabaw, uso pa ba ang sabliganay?

Plano pa naman unta nako dili maligo karon, aron lang malahi, pero sa dihang nadunggan nako nga adlaw diay ni San Juan kining Domingoha, nikaritil ko paingon sa banyo.

Mahadlok ko basin lain unya ang makapaligo nako. Binuang lang ha, gakaligo pa intawon ko matag adlaw.

Sa pag-gawas nako sa among hilom nga kasilinganan natagbuan nako si Tikyo nga nagasuroy og taho. Human ko nibayad sa usa ka tasa sa iyang baligya nga tag-cinco, gipangutana ko niya nganong wala ko nagpa bay-bay kay tua daw didto ang mga tawo nagdasok.

Giingnan ko siya ngano pud nga wa siya niadto didto nga tua man kaha ang baga nga tapok sa mga katawhan aron mahurot iyang baligya nga taho?

Nikatawa lang siya. “Bitaw no?” Matud pa niya.

Sulod ngari sa akong bag-ong blag

Pagtimbaya sa imong pagabot dinhi sa akong himo-himo nga luna sa kahawanang Cyber.

Sa tinuod lang ambisyoso kini nga tahak kay gusto kuno nako makapatik og blog nga sinuwat sa pinulongang puro nga Binisaya.

Ngano man? Wala lang gud basta lang naa ko’y madugang nga bag-ong kuris-kurisan.

Siguro pud, mao kini usa ka paagi nga mabansay-bansay nako akong kahibawo sa pagsulat sa binisaya, nga usa na sa mga nahimo nakong tinguha.

Siguro katong mga naka sunod sa akong pangandoy nga maka tukod ug Binisaya nga mantalaan sa Bukidnon maka-ingon nga timailhan kini nga gapanghinam na gyud ko.

Una-una iklaro nako nga dili ko bihasa o eksperto sa sinultian-pinulongang Binisaya o kon sa nailhang Cebuano. Apan usa ko sa katong mga pipila ka mga tawo nga dunay dili masabtan nga tinguha nga mapalambo pa gayud ang paggamit sa maong pinulongan dungan sa pagpalambo sa paggamit sa mga pinolungang langyaw sa ato, sama sa Ingles diha sa atong mga tulonghaan ug kaha sa publikong mga establisemento.

Mga Komentaryo didto sa Istambay sa Mindanao kabahin sa “Mga Kinurisang Binisaya”

Ang musonod mao ang mga komentaryo gikan sa “Istambay sa Mindanao” nga akong gibalhin dinhi aron matapok na gyud.

Blag: Mga Kinurisang Binisaya

(Gikan sa Istambay sa Mindanao)

Sa tinuod lang mao gayud kini nga panid ang tinubdan sa “Istambay sa Mindanao”.

Isip usa ka batan-ong manunulat sa mantalaang Central Mindanao Newswatch didto sa Dakbayan sa Malaybalay niadtong 2001-2004, isa ako sa mga nangandoy nga makatukod og Binisaya nga mantalaan sa Bukidnon.

Lisud man gud kaayo gamiton ang mantalaan sa pinulongang Ingles hilabi na sa pagpasabot sa kadaghanang katawhan mahitungod sa mga nagkalain-laing hisgutanan sa maong probinsiya.

Apan kay ang mga adbertaysir man maoy gusto sa pinulongang langyaw, matud pa sa among sinaligang ahente niadto, wala kini nahidayon.

Sa akong huna-huna, isalig ko nalang usa sa pipila ka mga istasyon sa radyo ang maong katuyuan. Hinuon mas dali daw nga mamati kaysa mobasa pa. Ang makaguol lang usahay mao ang mga unod sa mga balita ug hisgut-hisgut sa kahanginan.