Kagubot sa isla sa Basilan
Bintaha kay duna na diay migawas nga resulta sa imbistigasyon mahitungod sa kagubot sa Basilan, kung hain dunay katorse ka sundalo ang gipatay sa ambush, napulo kanila gipugotan og ulo.
Kay tungod nahitabo man kato taliwala sa bangi sa mga kasundalohan sa gobyerno ug sa Moro Islamic Liberation Front didto, namahimong bug-at nga pasanon kini hilabi na sa hisgutanang kalinaw o proseso sa pangkalinaw sa duha ka grupo.
Hapit na gyud baya to naggiyera kay nagpadala naman og dugang nga mga batalyon sa mga kasundalohan didto sa isla. Ang MILF pud wa man ni uyon sa ultimatum nga gipanaug sa Armed Forces of the Philippines nga ilang i-surrender ang gidudahang nipugot sa mga sundalo.
Maayo na lang kay duna kitay mekanismo sa hunong butohay (ceasefire mechanism) nga maoy nipasiugda sa imbestigasyon giubanan sa mga Bantay Ceasefire ug International Monitoring Team kon IMT.
Migawas nga Abu Sayyaf ang nipugot sa ulo, dunay sayop ang AFP sa dihang nisulod sila sa kampo sa MILF nga wala nakigsabot sa CCCH kon komiteba nga gisakopan sa GRP ug MILF alang sa paghunong sa armadong panagbangi (Joint Coordinating Committee on the Cessation of Hostilities).
Karon lang adlawa migawas sa mga mantalaang basi sa Manila nga niangkon kuno ang AFP nga nasayop ang ilang pagradyo.
Daghan pa siguro ang namahimong resulta sa maong pagimbestiga apan daghan niini wala pa mapagawas sa publiko kay dunay proseso ginasunod ang duha ka grupo isip pagrespeto sa ilahang mga nakasabutan na sa una.
Hinaut lang nga daghang mga pagtulun-an ang nakutlo sa matag grupo niining masakit nga kaagi, dili ba?
Dili na unta kini mahitabo pagusab hilabi na nga gamay lang nga kinaskasan sa kabaryohan mamahimo na kining babag sa tiunay nga kalinaw sa Mindanao.
September 20, 2007 at 3:16 am
Ang akong dugo susama ni Dagohoy, napadpad ang akong ginikanan sa Basilan tungod sa pagpangita ug trabaho niadtong 1960’s.
8 sa among 9 ka mag-suon nangatawo sa Basilan, usa niana ako. Namatay ang among kamagulangan gumikan sa kagubot sa Basilan- naambush niadtong Feb 14, 1999 Valentines Day. Lima ka church workers patay.
Lalum ang hinungdan sa kagubot sa Basilan. Dili relihiyon kon dili pulitika ang hinungdan sa kagubot. Daghan na ang nadato sa maong kagubot apan nagpabilin nga uyamot ang gagmayng tawo sa Basilan.
Gikan sa Abu Sayyaf nga natawo sa Basilan, Hello Garci Scandal ug tikas sa miaging eleksyon diin gipildi kuno ni Gloria si FPJ, ug sa pagpunggot sa ulo sa mga Marines. Nahimong sikat ang Basilan.
Lalum ang hinungdan sa kagubot ug nasayud niana ang atong gobyerno- tungod kay sila mao ang hinungdan sa maong kagubot inubanan sa mga lider sa probinsya nga walay mga kalag!
Magpabilin nga gubot ang Basilan tungod kay dinhi sila makakwarta ug sinaku ug manga-promote ang mga supsup nga mga heneral.
Hinaut nga mokanaog na ang Ginoo aron masulbad ang kagubot sa Basilan.