Hain taman ang Binisaya?

Jubert: Nganong maghimo man daw ka og blog nga Binisaya nga wa may mobasa ana? Usa pa, ikaw nga Inglisero kaayo mag Binisaya? Wa ka kuyapi?

Froi: Maglibog ka ana. Dapat mopili ka og isa sa duha ka pinulongan aron maoy imong bansayon. Dili pwede ang duha.

Ana: Ah, ka taas gud nimo og oras sa internet kay duha man ang imong blog?

Nagkalain-lain ang pasiunang mga reaksyon gikan sa akong mga kaila sa dihang akong gipaila-ila nila kining akong Binisaya nga blog.

Isa-isahon ko una kini pagtubag aron nga maklaro pud nako ang akong mga tinguha.

Jubert, aron ka masayod, daghan gustong mobasa ug sinuwat nga nakapatik sa Binisaya. Daghan ang interesado sa maong pinulongan nga motugpa pud sa internet, labi na katong dugay na wala nakagamit niini.

Siguro dili sama nimo nga usa ka 27 anyos nga sige lang og suroy-suroy sa bisan asang minahan apan wa pa gihapon kabalo unsa ang Binisaya sa “bad trip.” Binuang ra doy ha, ayaw unya kasuko nako.

Ang masa, isip usa ka ehemplo, mao’y sige og basa sa Binisaya kay bisan og daghang mga Pinoy ang makamao mobasa ug moistorya sa Iningles, daghan pa gihapon og mga pulong nga dili masabtan. Sama nalang anang mga pulong nga “good governance” unsa na, labi na kung dili nila makit-an sa ilang palibot.

Unsa man kaha tuyuon lang gyud aron malibog? Aron kaha  sayon lang sa kung kinsa ang naa sa taas o sa gahum? Sama atong hearing sa kaso sa usa ka korte, perte gyud ka Iningles sa Huwes, ipahubad ra man diay niya sa usa ka interpreter aron masabtan sa testigo ang iyang pangutana.

Moingon na unya na ang katawhan nga: “Unsa ba! Nagsunggo na ko!”

Naa bay mobasa sa internet? Duna pud ui! Susiha ra gud ning mga ni paathag sa ilang komentaryo didto sa akong usa ka blog.  (Basaha ni). Dunay nagkaanam og kadaghan nga mga propisyunal nga nakasabot ngano kinahanglan dili itago sa aparador ang Binisaya kung moabot na gani ang Tagalog o kaha ang Ingles.

Sabagay pila ba ang mga sinuwat nga nakamantala sa Binisaya sa atong palibot? Naay pipila sama sa Bisaya magasin o kaha ang mantalaang Super Balita sa Sun-Star.

Unya Bert ug Froi, sa akong pagpili nga magbuhat pud og blog nga Binisaya dili nagapasabot biyaan ko na ang akong trabaho isip usa ka reporter sa mantalaang nagapatik lang sa Ingles. Para nako, ang tanan dili lang mahitungod sa kung unsa imong trabaho kon dili apil pa gyud kung kinsa ka og unsa imong gusto.
Bisdak ko og dili maayo para nako nga maayo akong pagbansay sa pinulongang langyaw unya manghiwi nalang ko kong makadungog o makabasa ko ug Binisaya.

Para nako dili kinahanglan biyaan nimo ang usa aron nimo mabansay ang isa.

Busa bitaw nga igsoon kung Ana, pwede man nako tungaon akong oras sa pagblog sa Istambay sa Mindanao, nga nakapatik sa Ingles ug kining akong Binisaya nga blog.

Dili lang ko gusto nga taman lang sa balay ug sa dalan ang Binisaya kay sa tinuod lang, ang atong pagila sa kaugalingong pinulongan kabahin gihapon kini kung kinsa gyud ug unsa kita nga klase nga pagkatao.

Explore posts in the same categories: Binisaya, Bisdak ug uban pa!, Mga Bag-ong Tahas, Siryus