Adlaw ni San Juan sa Dabaw, uso pa ba ang sabliganay?

Plano pa naman unta nako dili maligo karon, aron lang malahi, pero sa dihang nadunggan nako nga adlaw diay ni San Juan kining Domingoha, nikaritil ko paingon sa banyo.

Mahadlok ko basin lain unya ang makapaligo nako. Binuang lang ha, gakaligo pa intawon ko matag adlaw.

Sa pag-gawas nako sa among hilom nga kasilinganan natagbuan nako si Tikyo nga nagasuroy og taho. Human ko nibayad sa usa ka tasa sa iyang baligya nga tag-cinco, gipangutana ko niya nganong wala ko nagpa bay-bay kay tua daw didto ang mga tawo nagdasok.

Giingnan ko siya ngano pud nga wa siya niadto didto nga tua man kaha ang baga nga tapok sa mga katawhan aron mahurot iyang baligya nga taho?

Nikatawa lang siya. “Bitaw no?” Matud pa niya.

Diri sa dakbayan sa Dabaw daw sama lang sa ordinaryo nga adlaw kining kapistahan ni San Juan Bautista (St. John the Baptist). Gawas nalang siguro didto sa barangay San Juan kung diin ingon ni Mayor Rodrigo Duterte nga makanunay kunong mi suporta kaniya.

Sa dihang nigawas ko didto sa dalan sa MacArthur, naistorya ko si Nong Unyot nga tag-iya sa usa ka karendirya. Matud pa niya sa Times Beach, sa Sasa, ug sa Samal kuno ang paingnan sa mga Dabawenyo kung adlaw ni San Juan.

Mao ba? Ginahinumdom gihapon kining adlawa nganhi?

Didto sa among dapit, sa Bukidnon, niadtong batan-on pa ko kayo, bibo ang sinabligay og tubig sa kadalanan aron paga saulogon ang San Juan.

Nasayod ko wala kini gimando sa simbahang Katoliko apan daghan ang nagpauso aning klase nga “pagbunyag” kunohay isip paghinumdom sa misyon ni San Juan.

Maayo lang siguro kung ikaw ang nakasablig. Haskang paita lang gyud kung ikaw ang nabasa samtang naga-sakay ug jeep paingon sa trabaho o kaha unsa bang lakawa.

Mao pud siguro nga wala na kini nag dugay nga tradisyon kay possible man gud pung tinubdan sa kagubot hilabi na kay lain-laing klaseng tawo na ang nanimuyo sa atong palibot karon. Dili ba?

Hain ka nagpabasa ning adlawa? Naligo ka ba?

Labaw sa tanan nakapamalandung ka ba unsa ang kahulogan sa pagsaulog sa pista ni San Juan? Ayaw lang pud ko pangutan-a. hehe.

Explore posts in the same categories: Mga Panghitabo sa akong palibot